13/04/2012

Un erro administrativo permite a tala con maquinaria pesada dentro dun castro



Reproducimos eiquí esta nova de MariñaPatrimonio na que se dá conta dun máis destes casos onde a deixadez vai da mao da máis evidente incompetencia como adoita ser tan corrente no noso patrimonio.

Tala con maquinaria pesada dentro das estruturas defensivas do castro






Un erro dos técnicos que catalogaron o castro de O Redondo déixano sen a protección legal que ampara este tipo de bens


O 27 de febreiro de 2012 ADEGA e Mariñapatrimonio denunciamos perante o Servizo de Patrimonio Cultural da Consellería de Cultura e o SEPRONA unha tala de eucaliptos que podía afectar o xacemento arqueolóxico de O Redondo, no lugar de Tarroeira, concello do Vicedo (Lugo). Este castro, catalogado dende o 2001, está protexido por lei para evitar o seu deterioro ou destrución, e calquera intervención nel debe ser autorizada pola Consellería de Cultura.



O 29 de febreiro os técnicos da Xunta realizaron unha inspección neste castro e constataron que, efectivamente, dentro das súas estruturas defensivas se estaba a realizar a tala denunciada, sen a preceptiva autorización. Comprobaron, ademais, que o “castro está mal situado”, o cal non quere dicir que os castrexos no seu momento levantaran o seu poboado nun lugar pouco axeitado, senón que os técnicos que o catalogaron situárono nun lugar equivocado. Deste xeito, estívose protexendo un xacemento inexistente ao tempo que se deixaba sen protección o castro de O Redondo.

Basa de columna atopada no castro do Redondo
Este novo caso de tala sobre un xacemento arqueolóxico e o erro na súa ubicación, confirman a ineficacia dos poderes públicos e a súa incapacidade para frear a continua agresión do noso patrimonio.

(Nota de prensa de ADEGA e MariñaPatrimonio)
  
Fotos: MariñaPatrimonio, para ver + clicka en:  MariñaPatrimonio

Nenhum comentário:

Postar um comentário

Lembre que ao colocar un comentario nesta páxina asume a responsabilidade polo contido das súas opinións.