Pezas que volven ao Neixón

Neixón recupera as 15.000 pezas achadas no xacemento

  

La Voz

Ribeira 08/04/2012

Marta Gómez

Uns 300 restos formarán parte dunha mostra 

que se está deseñando

Facía moito tempo que o Centro de InterpretaciónArqueolóxica de Barbanza esperaba poder ver reunidos todos os tesouros saídos das escavacións realizadas no castro de Neixón e, ao fin, esas valiosas pezas, unhas 15.000, volveron ao lugar do que partiron entre o 2003 e o 2011. As instalacións xa albergan nos seus interior restos arqueolóxicos que forman parte do pasado máis antigo do municipio boirense.

Que o centro de Neixón recuperase todas esas pezas non é gratuíto: forma parte dos trámites para conseguir que o centro arqueolóxico alcance a categoría de colección visitable. Unha vez que a logre, algo que está previsto que ocorra nos próximos meses, eses restos non só poderán quedar depositados nas instalacións de forma permanente, senón que poderán exporse ao público. De feito, o arqueólogo responsable do recinto, Víctor Barbeito, xa está a traballar na selección das pezas que formarán unha mostra e que, se nada se torce, os visitantes de Neixón poderán admirar no verán.

Mango de Asta de Cervo de O Neixon (Bejeda et alii, 2008)

Hasta de cervo

Aínda que falta moito traballo por facer para escoller as ao redor de 300 pezas que formarán esa colección -non hai espazo nin orzamento para exhibir unha mostra máis grande- hai algúns obxectos que formarán parte dela si ou si. Un deles é un mango realizado cunha hasta de cervo, varias fíbulas -unha especie de broches rechamantes pola súa beleza e detalles propios dun traballo de ourivaría-, restos de fauna que dan unha idea dos hábitos alimenticios dos antigos poboadores de Neixón, moitas mostras de cerámica, entre elas algunha ánfora practicamente enteira, e tamén moedas da época romana.

Todos estes vestixios estiveron até agora en mans dos responsables das sucesivas escavacións que se realizaron no xacemento boirense desde o ano 2003. Agora, e grazas a unha achega da Deputación provincial que permitirá acondicionar a primeira planta do edificio, poderán exporse no centro barbancés.

Nas próximas semanas deseñaranse e montarán as vitrinas necesarias para colocar as pezas, adoptaranse as medidas de seguridade precisas, adecuarase a iluminación para a conservación dos restos e redactarase o proxecto museográfico definitivo para a obtención do status xurídico de colección visitable.

Esa é a finalidade de todo un longo proceso que pretende converter ao centro de Neixón no primeiro recinto arqueolóxico da comarca coas características e o status necesario para poder gardar e exhibir restos prehistóricos. Un obxectivo que aparenta próximo a alcanzarse.

---