O novo petróglifo da Pedra dos Cervos

Achadego de un petroglifo

Faro de Vigo
03/08/ 2011
Redacción Ponte Caldelas

Unha nova figura para completar A Pedra do Cervo, en Ponte Caldelas

A roza efectuada recentemente pola Comunidade de Montes de Cuñas, en Ponte Caldelas para preservar A Pedra do Cervo dos efectos dun posible incendio forestal, permitiu que os afeizoados á arte rupestre Manuel Ledo e Anxo de Prado descubrisen unha nova figura que complementa e enche de sentido á do gran cérvido xa coñecido. Trátase da representación dun cazador que armado cun arco ou cun par de armas arreboladizas persegue ao venado ferido polo seu antagonista.

Informados o descubrimento, os membros do Grupo A Laxe da Irena, Antonio da Pena Santos e Buenaventura Aparicio Casado efectuaron un minucioso recoñecemento da pedra, procedendo da Pena a realizar un novo calco dixital que incorpora a figura do cazador. A Pedra do Cervo forma parte dun gran afloramento granítico que, a pesar do seu aproveitamento como canteira, pode deparar novos achádegos tras a consecuente roza e limpeza.

O descubrimento eleva o rango da Pedra do Cervo ao mostrar unha das escenas de caza máis suxestivas da arte rupestre galega. A Laxe dá Irena facilitou aos comuneiros de Cuñas unha copia do calco para que poidan contemplar a escea reproducida con total fidelidade.

Exposición

Así mesmo, onte tivo lugar a inaguración da exposición "Ponte Caldelas nos petróglifos" do fotógrafo Xulio Gil no Centro Cultural. Ao acto acudiu o alcalde Perfecto Rodríguez. A mostra componse dunha selección de vinte fotografas onde se observan os petróglifos máis significativos de todo o municipio, entre os que se atopan tipos de gravados xeométricos e naturalistas e o gran cervo da Laxe dás Cruces.